Albert Pashaj, pronari i “Euro Hotel” në Ksamil ka reaguar pas videos së bërë virale pasditen e sotme, ku ai u dhunua brutalisht nga një shtetas tjetër që ka biznesin e çadrava para hoteli të tij.
Alberti akuzon shtetasin Agim Taraj për ushtrim dhune fizike ndaj tij për herë të dytë brenda një muaji, brenda ambienteve të hotelit të tij.
Ai ndodhet aktualisht në spital pas sulmit të fundit dhe shpreh zhgënjimin ndaj mosveprimit të institucioneve shtetërore, pavarësisht kallëzimit të bërë për një ngjarjen të ngjashme të ndodhur disa javë më parë.
“Ky zoti Agim Taraj, bashkë me një grup personash, ka ushtruar dhunë fizike ndaj meje në hotelin tim, në momentin kur klientët ishin duke konsumuar mëngjesin. Kjo është hera e dytë që më dhunon dhe autoritetet nuk kanë marrë asnjë masë. Ndodhem në spital dhe ndjej që jam i braktisur nga shteti.”, thotë Albert Pashaj.
Sipas tij, ngjarja lidhet me një konflikt për shfrytëzimin e plazhit përballë hotelit. Ai deklaron se ka miratim nga AKB për strukturën akomoduese dhe plazhin, por Bashkia Sarandë ka refuzuar të firmosë kontratën, duke favorizuar një tjetër subjekt, që sipas Pashajt, nuk ka as hotel dhe as dokumentacion të rregullt.
