Gjykata e Lezhës ka lënë në burg Jetmir Llanin, i arrestuar për gjobvënie bizneseve. Llani është paraqitur mëgjesin e sotëm në gjykatë nën masa të rrepta sigurie, ku është njohur me masën e sigurië vetëm 3 ditë pasi u arrestua.
Sipas policisë, Llani në bashkëpunim me tre persona të tjerë u vendosnin gjoba bizneseve, duke ushtruar presion dhe kërcënuar me armë. Ai përdorte 2 të mitur dhe 2 persona të tjerë që i dërgonte tek bizneset duke përcjellë mesazhet e tij të kërcënimeve për përfitim pasuror të padrejtë.
Llani u arrestua të hënën, ndërsa kapja e tij erdhi si rezultat i ndërhyrjes së specializuar policore të shërbimeve të Forcës Speciale “RENEA”, me mbështetjen e shërbimeve operacionale të Policisë së Lezhës dhe të shërbimeve të Komisariatit të Policisë Kurbin. Gjatë kontrolleve gjetën dhe sekuestruan 1 armë gjahu, municion luftarak dhe 2 automjete të blinduara, të cilat përdoreshin për të kryer këtë veprimtari.
Jetmir Llani, nuk është një emër i panjohur për drejtësinë shqiptare. Ai më herët ka qenë në burg për vrasje, pasi mori hak për vrasjen e djalit të tij 9-vjeçar, Indrit Llani.
