Policia ka dalë me një tjetër njoftim zyrtar në lidhje me arratisjen nga burgu të Daut Lazes, i cili ishte duke vuajtur dënimin në burgun e Shënkollit dhe është arratisur gjatë natës. Policia thotë se Laze është një person me rrezikshmëri të lartë, dhe ofron 10 mijë euro për këdo që ka informacion mbi vendodhjen e tij.
Nuk dihen ende rrethanat se si Laze është larguar, por Drejtoria e Burgjeve deklaroi pak më herët se ai është arratisur duke shfrytëzuar ambientin e mjekimit në këtë burg, për tu larguar nga rrethimi i institucionit. Ndërkohë po analizohen pamjet e kamerave për të zbardhur dinamikën e ngjarjes.
Njoftimi i Policisë:
Menjëherë pas njoftimit nga Drejtoria e Përgjithshme e Burgjeve, se në orët e para të mëngjesit të sotëm, gjatë ndërrimit të turneve dhe kryerjes së apelit në Institucionin e Posaçëm Mjekësor, Lezhë, është konstatuar mungesa e pacientit, shtetasit Daut Laze, 49 vjeç, shërbimet e Policisë së Shtetit kanë organizuar punën dhe po kryejnë kontrolle intensive për gjetjen e tij.
Sqarojmë se shtetasi Daut Laze është arrestuar në vitin 2021, për veprën penale “Dhuna në familje”, dhe në vitin 2024, Gjykata e Tiranës i ka caktuar masën “Mjekimi i detyruar në një institucion mjekësor”.
49-vjeçari paraqet rrezikshmëri shoqërore, prandaj kërkojmë ndihmën e qytetarëve, për të njoftuar menjëherë Policinë e Shtetit, për çdo të dhënë në lidhje me vendndodhjen e tij.
Në bashkëpunim me Drejtorinë e Përgjithshme të Burgjeve, vijon puna për lokalizimin dhe kapjen e 49-vjeçarit.
Policia e Shtetit ka vendosur shpërblimin 10 000 euro për çdo informacion të vlefshëm mbi vendndodhjen e këtij shtetasi. Qytetarët mund të njoftojnë në numrin pa pagesë 112 të Policisë së Shtetit dhe në numrin 068 200 29 61, të vendosur nga Drejtoria e Përgjithshme e Burgjeve.
