Jahti luksoz M/Y A+ është ankoruar ditën e sotme në portin e Durrësit dhe ashtu si të gjitha mjetet e tjera lundruese super të shtrenjta do të furnizohet me karburant. Dhe jo pak por plot 900 mijë litra. Vetëm se me këtë sasi rekord karburanti nuk do të furnizohet vetëm superjahti M/Y A+, por edhe dy të tjerët që e shoqërojnë M2 dhe Alesund.
Mjeti lundrues superluksoz që kushton rreth 450 milionë dollarë, 147 metra i gjatë, është në pronësi të sheikut Mansour bin Zayed Al Nahyan, bosit të ekipit të Manchester City. Ai rikthehet çdo verë në portin më të madh në vend për të përfituar nga tarifat e lira me të cilën shteti shqiptar u mundëson këtyre mjeteve të furnizohen me karburant. I lëshuar në det 11 vite më parë, jahti luksoz është prodhuar në kantierin e Bremenit, në Gjermani.
Porti i Durrësit ka qenë vitet e fundit vendndalesa e zakonshme për disa nga superjahtet më të mëdhenj të botës, për shkak të naftës pa akcizë me të cilën furnizohen këto mjete. Nga taksa e luksit që aplikojnë autoritetet shqiptare, 40 lekë për litër, shteti arkëton miliona euro çdo vit në arkën e tij.
Vetëm gjatë ditës së sotme mësohet se autoritetet do të arkëtojnë plot 36 milionë lekë të reja nga 3 superjahtet luksoze.
