Gjatë një takimi të zhvilluar në Nju Jork me presidentin turk Recep Tayyip Erdogan, Donald Trump nuk e kurseu ironinë.
Trump, duke përsëritur pretendimin e tij se zgjedhjet presidenciale të vitit 2020 në SHBA ishin të manipuluara, u kthye nga Erdogan dhe tha me ironi: “Ai i njeh më mirë se kushdo zgjedhjet e manipuluara”, një deklaratë që u shoqërua me të qeshura, por që u interpretua edhe si një goditje e drejtpërdrejtë ndaj mënyrës se si udhëhiqet Turqia.
Batuta e Trump lidhet me kritikat e vazhdueshme që Erdogan ka marrë ndër vite për mënyrën autoritare të ushtrimit të pushtetit dhe dyshimet për parregullsi në proceset zgjedhore në Turqi.
Megjithatë, Trump u shpreh se “respekton fuqinë dhe lidershipin e fortë të Erdogan”, duke i dhënë takimint një ton kontradiktor mes ironisë dhe komplimentit.
Takimi mes dy liderëve vjen në një kohë tensionesh të larta ndërkombëtare, ku marrëdhëniet SHBA–Turqi mbeten delikate për shkak të çështjeve gjeopolitike, që nga lufta në Lindjen e Mesme deri te bashkëpunimi brenda NATO-s.
Megjithë ironitë gjatë takimit, Erdogan u shfaq i kënaqur me vizitën e tij në Uashington, e cila u zhvillua paralelisht me Asamblenë e 80-të të Përgjithshme të OKB-së.
Në fjalimin e tij në turqisht, ai theksoi se marrëdhëniet midis Turqisë dhe SHBA-së kanë potencial të ngrihen në një nivel të ri, duke shtuar se në qendër të bisedimeve do të jenë çështje si avionët luftarakë F-35 dhe F-16.
