Kriza në Lindjen e Mesme ka qenë tema kryesore e një bisede telefonike mes presidentit të sapozgjedhur të SHBA, Donald Trump, dhe kryeministrit izraelit, Benjamin Netanyahu. Gjatë telefonatës, e zhvilluar mëngjesin e sotëm, dy liderët kanë diskutuar përpjekjet për një marrëveshje mbi lirimin e pengjeve të mbajtura në Rripin e Gazës dhe për situatën e tensionuar në Siri.
Trump ka theksuar se dëshiron të arrihet një armëpushim dhe një marrëveshje për kthimin e pengjeve përpara se të marrë detyrën më 20 janar. Ai ka paralajmëruar se në rast të mosrealizimit të këtyre objektivave, do të ketë pasoja të ashpra.
Ndërkohë, në Siri situata mbetet e trazuar pas rënies së regjimit të Bashar al-Asad dhe marrjes së pushtetit nga grupi rebel Hay’at Tahrir al-Sham.
I dërguari special i OKB-së për Sirinë, Geir Pedersen, mbërriti sot në Damask për një takim me liderin e HTS, Abu Mohammad al-Jolani, i njohur me emrin e tij të vërtetë, Ahmad al-Chareh. Sipas një deklarate të publikuar nga grupi, takimi u fokusua në zhvillimet politike dhe nevojën për të rishikuar Rezolutën 2254 të Këshillit të Sigurimit të OKB-së, e cila përcakton një udhërrëfyes për zgjidhjen politike të konfliktit sirian.
