Donald Trump nënshkroi një urdhër ekzekutiv për të krijuar një program të ri vizash, të quajtur “Karta e Artë”, e cila i ofron të huajve me aftësi të jashta zakonshme mundësinë për të jetuar dhe punuar në Shtetet e Bashkuara duke paguar një tarifë prej një milion dollarësh. Ky program synon të zëvendësojë vizën aktuale EB-5 për investitorët emigrant dhe do t’u jepet shtetësia amerikane atyre që investojnë në bizneset amerikane.
Sipas presidentit amerikan, ky sistem do të jetë një “sukses i madh” dhe do të sjellë kapital të rëndësishëm në vend. Megjithatë, kritikët ngrisin shqetësime se përparësia duhet të jetë tërheqja e talenteve të kualifikuara përmes një sistemi më të drejtuar.
Ja si funksionon: individët që fitojnë kartën duhet të paguajnë 1 milion dollarë, ndërsa kompanitë që sponsorizojnë një punonjës do të paguajnë 2 milion dollarë, përveç një tarife verifikimi prej 15 mijë dollarësh. Sekretari i Tregtisë, Howard Latnick, theksoi se karta është e ngjashme me kartën e gjelbër dhe se mbajtësit do të paguajnë taksa globalisht, si qytetarët amerikanë.
Ky program është pjesë e një iniciative më të gjerë të administratës Trump për të rritur të ardhurat për Thesarin duke eksploruar shumë burime të reja të financimeve. Që nga marrja e detyrës, Trump ka zbatuar taktika të ndryshme për të mbledhur fonde, përfshirë tarifat e reja për produkte dhe shërbime, si dhe investime në kompani teknologjike.
Sidoqoftë, shqetësimet për këtë program mbeten të forta. Disa kritikë e shohin “Kartën e Artë” si një mënyrë për të favorizuar ata që kanë mjetet financiare, në vend të një sistemi që angazhon qartë talente të kualifikuara. Ndërkohë, një tjetër lloj vize, e quajtur “Karta e Platinumit Trump”, duket se nuk do të dalë së shpejti.
Ky program parashikohet të ndihmojë shumë në promovimin e investimeve të huaja në SHBA, por vendimi për ta implementuar ngre diskutime rreth drejtësisë dhe qëllimeve të tij afatgjata.
