Presidenti amerikan Donald Trump ka deklaruar se marrëdhëniet mes Shteteve të Bashkuara dhe Kinës janë në një nivel të mirë, duke theksuar se të dy vendet “kuptojnë njëri-tjetrin”, pavarësisht përplasjeve të mëparshme për çështje tregtare, të sigurisë dhe teknologjisë.
Në një intervistë për Fox News, Trump tha se bashkëpunimi me Kinën është në interes të SHBA-së, duke e përshkruar atë si “diçka shumë të mirë”.
Gazetarja Maria Bartiromo i kujtoi disa nga çështjet më të debatueshme që kanë tensionuar marrëdhëniet dypalëshe, si sulmet kibernetike, vjedhja e pronësisë intelektuale, pandemia e COVID-19 dhe trafiku i fentanilit – për të cilat SHBA ka akuzuar Kinën.
Trump reagoi duke thënë:
“A mendoni se ne nuk veprojmë në të njëjtën mënyrë ndaj tyre? E bëjmë. Kështu funksionon bota. Është një botë e ashpër.”
Në lidhje me tarifat 145% që SHBA vendosi në prill ndaj disa produkteve kineze – vendim i pezulluar deri në gusht – Trump tha se këto masa ndikuan menjëherë:
“Gjithçka u ndal në Kinë kur vendosëm tarifat.”
Nga ana tjetër, Pekini ka njoftuar arritjen e një marrëveshjeje të përkohshme tregtare me SHBA-në, që përfshin lehtësimin gradual të kufizimeve ndaj produkteve kineze dhe një rritje të mundshme të eksporteve.
Pas raundit të fundit të bisedimeve të zhvilluara në Gjenevë në muajin maj, dy vendet ranë dakord të ndalin përkohësisht luftën tregtare, duke reduktuar tarifat reciproke dhe duke hapur rrugën për dialog të mëtejshëm ekonomik.
