Presidenti i SHBA-së, Donald Trump thotë se nuk ka plane të dëbojë Princin Harry nga SHBA- ja në mes të një beteje ligjore për statusin e tij të imigracionit. Trump nuk kurseu kritikat edhe ndaj bashkëshortes së tij, Meghan Markle.
“Unë nuk dua ta bëj këtë”, tha Trump për New York Post. “Unë do ta lë atë.”Ai ka shumë probleme me gruan e tij. Është e tmerrshme”, shtoi ai.
Në mars të vitit të kaluar Trump deklaroi se nëse ai rizgjedhet president i Shteteve të Bashkuara, mund ta dëbojë Princ Harryn nga SHBA për shkak të përdorimit të drogës në të kaluarën.
Ai shprehej asokohe se bashkëshorti i Meghan Markle nuk do të ketë “privilegje të veçanta” nëse ka gënjyer për përdorimin e drogës gjatë aplikimit për vizë amerikane. Harry, në autobiografinë e tij “Spare”, kishte zbuluar se ai kishte përdorur drogë në të kaluarën, e cila sipas ligjit amerikan normalisht do të ishte arsye për refuzimin e një aplikimi për vizë.
