Trishtimi për humbjen tragjike të ish-sulmuesit të Liverpool-it, Diogo Jota, dhe vëllait të tij vazhdon të jetë i thellë, ndërsa autoritetet spanjolle po hetojnë ende rrethanat e aksidentit fatal.
Sipas raportit fillestar të policisë, shkak i aksidentit dyshohet të ketë qenë shpejtësia e lartë e makinës Lamborghini Huracán, që thuhet se ka kaluar limitin prej 120 km/h, dhe shpërthimi i një gome që ka çuar në humbjen e kontrollit dhe daljen nga rruga.
Por, kjo version zyrtar është vënë në pikëpyetje nga dy dëshmitarë okularë, të cilët kanë qenë ndër të parët që kanë mbërritur në vendngjarje. Kamionisti José Azevedo, i cili gjithashtu ka regjistruar videon e publikuar më vonë në rrjetet sociale, deklaron: “Ata kaluan pranë meje shumë qetë, pa asnjë shpejtësi të tepruar. E dërgova videon në CMTV sepse filluan të qarkullonin lajme të pabaza.”
Azevedo iu drejtua edhe familjarëve të viktimave me një mesazh ngushëllimi dhe sqarimi:
“Ju jap fjalën time, nuk po ngisnin me shpejtësi. Ishin shumë të qetë. Unë bëj këtë rrugë çdo ditë, e njoh mirë. Është e errët dhe e rrezikshme. Kam parë markën dhe ngjyrën e makinës shumë qartë.”
Deklarata e tij përforcohet edhe nga një tjetër dëshmitar, kamionisti José Aleixo Duarte, i cili gjithashtu ka filmuar skenën dhe ka tentuar t’i shpëtojë dy të rinjtë, por pa mundur të bëjë asgjë për t’i nxjerrë nga makina në flakë.
Hetimet për shpërthimin e gomës dhe rrethanat e aksidentit vazhdojnë, ndërkohë që zërat kundër versionit zyrtar po shtohen, duke hapur një debat të ri mbi atë që ndodhi realisht në atë natë tragjike në autostradën A-52 në Spanjë.
