Një ngjarje tronditëse ka tronditur qytetin Quarto, pranë Napolit, ku dy vëllezër italianë janë arrestuar nga karabinierët me akuzën e rëndë për vrasjen e babait të tyre, 71-vjeçarit Antonio Di Gennaro.
Trupi i të moshuarit u gjet i fshehur brenda një arkë plastike, në tarracën e banesës ku jetonin të dy djemtë. Hetimet nisën pasi partnerja e viktimës raportoi zhdukjen e tij më 3 qershor. Ajo nuk kishte pasur asnjë kontakt me të për ditë me radhë.
Sipas mediave italiane, ngjarja dyshohet të ketë qenë e planifikuar. Vëllezërit, të moshës 34 dhe 42 vjeç, i kanë dhënë të atit një pilulë gjumi të hedhur në kafe dhe më pas e kanë mbytur me jastëk, pasi ai refuzoi t’u jepte pensionin e së ndjerës, nënës së tyre.
Të arrestuarit janë identifikuar si Michele Di Gennaro, inxhinier biomjekësor, dhe Andrea Di Gennaro, trajner personal. Të dy nuk kishin precedentë penalë dhe gjatë marrjes në pyetje nga policia, kanë pranuar autorësinë e krimit.
Trupi i viktimës u gjet nga hetuesit në banesën në Via Cicori, një zonë qendrore e qytetit. Ndërkohë, autoritetet italiane vijojnë hetimet për të zbardhur plotësisht motivet dhe dinamikën e vrasjes që ka shokuar opinionin publik.
