Teksa janë bërë 24 orë nga gjetja e lëndës shpërthyese pranë një hoteli në pronësi të vëllait të Vangjush Dakos në zonën e Vollgës, policia ende nuk ka ndonjë të dhënë mbi objektivin dhe personin që e ka lënë atë para hotelit.
Burime për Syri tv nga policia kanë konfirmuar se hoteli i kishte kamerat janë funksioni dhe grupi hetimor nuk ka mundur të sekuestrojë asnjë pamje sigurie për të krijuar një ide për autorin dhe intenerarin e tij.
Megjithatë janë sekuestruar pamjet e kamerave të tjera në zonë për të përftuar ndonjë të dhënë. Por sipas policisë lënda eksplozive nuk mund të shpërthente pasi nuk kishte mekanizëm të montuar.
Nuk është e qartë nëse kemi të bëjmë me një mesazh për Vangjush Dakon apo vëllain e tij, apo ndonjë personi lënda eksplozive i ka rënë rastësisht. Pakoja me lëndë eksplozive u gjet nga qytetarë të rastit të cilët kaluan në zonë rreth orës 17:00.
Ato lajmëruan policinë e Durrësit dhe më pas forcat xheniere dhe ato RENEA erdhën për të bërë shpërthim të komanduar dhe konstatuan se në pako kishte lëndë shpërthyese.
Një situatë e ngjashme ndodhi dhe në 21 maj të këtij viti po në qytetin e Durrësit, këtë herë pranë banesës së Vangjush Dakos në zonën e Velierës. Një pako me lëndë eksplozive u pikas sërish nga disa qytetarë të cilët lajmëruan policinë.
Pas disa orësh, forcat xheniere kryen shpërthim të komanduar duke shmangur dëme më të mëdha nëse ajo do të kishte shpërthyer.
Është e paqartë nëse ngjarja e 21 majit ka lidhje me atë të 13 shtatorit, për shkak se për ngjarjen e parë nuk ka një person të arrestuar dhe një pistë konkrete nga policia.
