Të martën, një pjesë e tregtarëve rom në Gjirokastër janë rikthyer për të ushtruar veprimtarinë e tyre në ambientet e tregut të vjetër, në lagjen “Gërhot”, pavarësisht ndërhyrjeve të bashkisë për lirimin e kësaj hapësire. Autoritetet vendore kishin kërkuar zhvendosjen e tyre në tregun e ri, të ndërtuar në lagjen “Zinxhira”, por komuniteti rom vazhdon të kundërshtojë këtë vendim.
Sipas tregtarëve, kalimi në tregun e ri ka ndikuar negativisht në gjendjen e tyre ekonomike, duke u vështirësuar mundësinë për të siguruar të ardhura minimale për mbijetesë.
“Ne jemi tregtarë romë, përfaqësojmë një komunitet që përballet me shumë vështirësi. Kërkojmë një treg të përshtatshëm edhe për ne, ashtu si për të gjithë të tjerët,” u shpreh një prej tyre.
Një tjetër shtoi: “Këtu ishim të sistemuar mirë, mund të rreshtoheshim rregullisht, na nevojiten kushte minimale si tualetet dhe furnizimi me ujë.”
“Po ndodh kjo vetëm për ne romët. Duam të na lejojnë të qëndrojmë këtu, të na krijojnë kushte që të mund të ushqehemi e të jetojmë,” u shpreh një tjetër banor.
Kujtojmë se të hënën, Bashkia e Gjirokastrës ndërmori një aksion për lirimin e tregut të vjetër, i cili prej vitesh është përdorur si hapësirë tregtare nga komuniteti rom, duke i zhvendosur tregtarët në një treg të ri të posaçëm.
