Një ngjarje tragjike ka ndodhur në Spitalin e Pejës, ku një fëmijë një vjeç e gjysmë humbi jetën.
Sipas raportit të Policisë, babai i fëmijës ka deklaruar se e kishte sjellë djalin për trajtim në spital një ditë përpara, por pas disa ekzaminimesh, atij iu dha leja për t’u kthyer në shtëpi.
Më pas, fëmija përjetoi përkeqësim të gjendjes shëndetësore dhe u dërgua sërish në spital, ku fatkeqësisht vdiq.
Babai ka raportuar se gjendja e fëmijës ishte më e rëndë kur e kishte çuar për herë të dytë, dhe se ai është shprehur se trajtimi mjekësor për të birin ka qenë i papërshtatshëm dhe i papërgjegjshëm.
Rasti është cilësuar nga Policia si “trajtim i papërgjegjshëm mjekësor”. Njësitë e hetimit janë duke shqyrtuar situatën dhe, me urdhër të prokurorit, trupi i fëmijës është dërguar në Institutin e Mjekësisë Ligjore për obduksion.
Autoritetet nuk kanë dhënë ende një deklaratë konkrete për këtë rast. ndërkohë që ngjarja ka shkaktuar shqetësim mes prindërve dhe komunitetit në përgjithësi, duke ngritur pyetje lidhur me standartet e kujdesit shëndetësor në spitalet publike.
