Sot, skena dhe kinematografia shqiptare humbn një nga figurat e saj më të njohura, aktorin Fitim Makashi, i cili u nda nga jeta në moshën 81-vjeçare. Një figurë e spikatur e artit shqiptar, Makashi zë një vend të veçantë me një karrierë që përfshin teatër dhe film, duke lënë pas një trashëgimi artistike mbresëlënëse.
Fitim Makashi, i lindur më 10 prill 1944 në Gjirokastër, filloi studimet në Institutin e Arteve në vitin 1963 dhe përfundoi ato në vitin 1967, pas së cilës u emërua pedagog. Karriera e tij artistike mori hov me filmin “Dueli i heshtur”, pas së cilit ai u shfaq në një sërë filmash të tjerë të njohur shqiptarë, si “Prita”, “Njësiti gueril” dhe “Ilegalët”, mes të tjerash.
Përveç punës në kinematografi, Makashi la një gjurmë të thellë edhe në teatër. Ai ka interpretuar role të paharrueshme si Pedagogu në “Pas provimit të dytë”, dhe Filipoviçi në “Inspektori”, i fundit në karrierën e tij teatrale. Mund të thuhet se performancat e tij kanë ndikuar dhe frymëzuar breza të tërë artistësh dhe adhuruesish të artit.
Në jetën personale, ai ishte baba i këngëtarit të njohur Redon Makashi, i cili në një intervistë të fundit zbuloi se aktori po luftonte me demencën. Kjo e bën humbjen e tij edhe më të prekshme, pasi artisti po përballej me një çështje të rëndë shëndetësore në fund të jetës së tij.
Humbja e Fitim Makashit është një ngjarje e rëndësishme për kulturën dhe artin shqiptar, për shkak të ndikimit të tij të gjerë. Trashëgimia e tij artisitke dhe rolet e paharrueshme do të mbahen mend dhe do të inspirojnë artistët e ardhshëm. Ai do të kujtohet si një nga emblemat më të shquara të kinematografisë dhe teatrit shqiptar.
