Një tubim politik në shtetin indian Tamil Nadu është kthyer në tragjedi, pasi të paktën 40 persona kanë humbur jetën dhe mbi 50 të tjerë janë plagosur gjatë një përplasjeje masive.
Ngjarja ndodhi në aktivitetin e organizuar nga aktori i njohur i kinemasë indiane dhe tashmë politikan, Vijay, i cili kishte mbledhur mijëra mbështetës. Viktimat përfshijnë burra, gra dhe fëmijë. Kryeministri i Tamil Nadus, M.K. Stalin, konfirmoi bilancin e rëndë dhe njoftoi se 51 persona të tjerë po marrin trajtim mjekësor intensiv.
Sipas shefit të policisë, vonesa në mbërritjen e politikanit përkeqësoi situatën, pasi turma kishte pritur për orë të tëra pa ushqim dhe ujë. Ai shtoi se leja ishte dhënë për një tubim me 10,000 persona, por numri real ishte mbi dyfishin.
Pamjet e publikuara nga mediat vendase tregojnë Vijay-n duke shpërndarë ujë dhe përpjekjet e tij për të ndihmuar mbështetësit që po humbnin ndjenjat.
Në një reagim në platformën X, aktori dhe politikani tha se ishte i shkatërruar emocionalisht nga tragjedia, duke shprehur ngushëllimet për familjarët e viktimave. Kryeministri Stalin ndërkohë njoftoi kompensime financiare për familjet e të ndjerëve dhe ngritjen e një komisioni hetimor për zbardhjen e rrethanave.
