Gjykata e Posaçme Kundër Korrupsionit dhe Krimit të Organizuar ka dhënë dënimin për 7 anëtarët e një grupi kriminal të akuzuar për një sërë veprash të rënda penale, mes të cilave trafik narkotikësh, dhe sigurim kushtesh për vrasje.
Bëhet fjalë për Ismail Zenelin, Bujar Ajetin, Adrian Cenajn (Dedja), Dedan Gjonin (ish-shefi i krimeve), Besmir Murtatin dhe Albert Prengën.
Gjykata ka pranuar gjykim të shkurtuar për 7 të pandehurit, duke sjellë uljen me 1/3 të masës së dënimit për secilin prej tyre.
Dënimet e vendosura nga GJKKO
Ismail Zeneli u shpall fajtor për disa vepra penale, përfshirë “Trafikimi i narkotikëve”, “Grup i strukturuar kriminal” dhe “Sigurimi i kushteve për të kryer vrasje”. Në total, pas aplikimit të gjykimit të shkurtuar, ai u dënua me 10 vite burg, me vuajtje në një burg të sigurisë së lartë.
Bujar Ajeti (Gremizi) u dënua për “Sigurimi i kushteve për vrasje”, “Grup i strukturuar kriminal”, “Mbajtje pa leje të armëve” dhe “Përkrahje të autorit të krimit”. Gjykata e deklaroi të pafajshëm për një nga akuzat e armëmbajtjes. Pas uljes për gjykimin e shkurtuar, dënimi përfundimtar është 6 vite burg.
Adrian Cenaj (Dedja) u shpall fajtor për “Sigurimi i kushteve për vrasje” dhe “Grup i strukturuar kriminal”, duke u dënuar përfundimisht me 4 vite burg.
Dedan Gjoni – ish shefi i krimeve u dënua për “Sigurimi i kushteve për vrasje”, “Trafikimi i narkotikëve”, “Grup i strukturuar kriminal” dhe “Shpërdorim detyre”. Në total, duke përfituar ulje nga gjykimi i shkurtuar, ai u dënua me 8 vite burg.
Besmir Murtati u shpall fajtor për “Trafikim narkotikësh” dhe “Grup i strukturuar kriminal”, me një dënim përfundimtar prej 8 vite burg.
Albert Prenga u dënua për të njëjtat dy vepra penale si Murtati, duke përfunduar me 8 vite burg.
