Sipas deklaratave të fundit të Massimo Morattit, ish-presidentit të Interit, gjatë një interviste për “Corriere della Sera”, në të kaluarën Roma, për shkak të borxheve të mëdha, i kishte ofruar mundësinë për të blerë Francesco Tottin.
Moratti tha: “Pronësia e Romës ishte e mbushur me borxhe… Presidenti ishte aq i dëshpëruar sa ma ofroi Tottin, duke qarë… Ndoshta Totti do të kishte vendosur të qëndronte te Roma, por ne nuk i vazhduam negociatat”.
Megjithatë, këto deklarata janë mohuar nga Rosella Sensi, vajza e ish-presidentit të Romës, Franco Sensi. Ajo reagoi duke thënë: “Mbeta e befasuar dhe e zhgënjyer. Më vjen keq të lexoj fjalët e Massimo Morattit në ‘Corriere della Sera’, ku flet për një Romë të dëshpëruar në borxhe, që ia ofronte Tottin një rivali si Interi.
Babai im kurrë nuk ka menduar asnjëherë ta shesë Francesco te ndonjë klub tjetër. Mjafton të pyesni presidentin dhe mikun Florentino Perez, i cili e kuptoi menjëherë se nuk kishte asnjë mundësi për të hapur negociata transferimi të Tottit te Real Madridi”.
Deri më tani nuk kishte pasur një reagim publik nga vetë Francesco Totti lidhur me këto deklarata, por dje ish-kapiteni verdhekuq e prishi heshtjen dhe sqaroi mbi këtë temë polemizuese:
“Moratti është një zotëri, numër një, por deklaratat e tij nuk më pëlqyen. Sensi nuk ka dashur kurrë të më shesë, ai nuk ka pranuar asnjëherë, ka qenë gjithmonë i vendosur për këtë. Pra, në të vërtetë, ishte e kundërta.
Moratti dhe Interi më donin, por për Sensi kam qenë gjithmonë i paçmueshëm. Dhe kjo duhet thënë. Për të nuk kishte asnjë dilemë, ashtu siç nuk kishte për mua: të qëndroja vetëm te Roma. Kjo është e vërteta”.
