SPAK ka dhënë pretencën për dosjen e dytë në ngarkim të ish-kryebashkiakut të Himarës Jorgo Goro, dhe kërkon dënimin me 2 vite burg, dënim i cili zbret në 1 vit e 4 muaj për shkak të gjykimit të shkurtuar.
Edhe ndaj të bashkëpandehurit Vasillaq Strakosha, ish-drejtor i menaxhimit të pronës në Bashkinë Himarë, kërkohet dënimi me 1 vit e 6 muaj, dënim i cili zbret në 1 vit burg për shkak të gjykimit të shkurtuar.
Këtë herë Gjykata e Posaçme do ta gjykojë atë për “shpërdorim detyre” më shumë se një herë, kryer në bashkëpunim me dy ish-drejtorë të bashkisë Himarë që drejtohej prej tij.
Sipas SPAK ai ka abuzuar me detyrën duke ndërmjetësuar për një pronë, e cila më pas iu vendos në dispozicion një subjekti tregtar.
Më herët Goro u dënua edhe për çështjen e parë, ku akuzohej edhe për shpërdorim edhe për fshehje të ardhurash me pronat në Himarë.
Gjykata e shpalli atë fajtor dhe e dënoi me 3 vjet burg dhe 5 vjet heqje të së drejtës për të ushtruar detyrën.
