Përfaqësuesi i “Diaspora për Shqipërinë e Lirë” Florjan Haçkaj ka denoncuar në Prokurorinë e Posaçme zyrtarë të ndryshëm të shtetit, mes tyre zv/kryeministren Belinda Balluku për patronazhimin e votës së emigrantëve, duke shkelur në mënyrë të hapur Kodin Zgjedhor dhe duke konsumuar vepër penale.
Ai iu referua rastit të kryebashkiakes së Lushnjës, Eriselda Sefa, që ka krijuar një database me të dhënat e emigrantëve të kësaj bashkie, me qëllim për të ndikuar votën e tyre.
“Kemi dorëzuar dokumentet se si kanë patronazhuar me adresa dhe numra telefoni të gjithë qytetarët në diasporë, me qindra të tillë. Kemi dorëzuar padi kundër Ballës, Ballukut, Çuçit, Kumbaros, në Greqi regjistruan masivisht diasporën. E kemi ngritur më përpara këtë shqetësim në SPAK, në KQZ, në Prokurorinë e Përgjithshme dhe sot po e sjellim edhe zyrtarisht”, u shpreh Haçkaj.
Ai kërkoi që rastet e hetimit të krimeve zgjedhore duhet të marrin përgjigje para zgjedhjeve të 11 majit.
“Ne kemi besim tek SPAK. Duam që rezultatet për këto të dalin para certifikimit të zgjedhjeve, se më pas nuk i interesojnë kujt”, theksoi ai.
Përfaqësuesi i diasporës u bëri thirrje emigrantëve që të mos fotografojnë votën duke u kujtuar se kjo është e dënueshme penalisht.
“I bëj thirrje qytetarëve të mos e publikojnë votën se këtë e kap Kodi Penal, është e dënueshme nga 3 muaj deri në 3 vite burg. Duhet ta ruajmë fshehtësinë e votës me çfarë kemi në dorë”, përfundoi Haçkaj.
