Klubi i Tiranës ka bërë zyrtar sonte “divorcin” me trajnerin Bledi Shkëmbi, i cili u ka dhënë lamtumirën me mirëkuptim bardhebluve. Palët kishin kontratë edhe për një tjetër sezon, por ditën e djeshme është gjetur dje akordi për mbylljen e bashkëpunimit dypalësh.
“Klubi i Futbollit Tirana njofton përfundimin e bashkëpunimit me trajnerin Bledi Shkëmbi. Pas një marrëveshjeje të ndërsjellë, palët kanë vendosur të mbyllin bashkëpunimin profesional.
KF Tirana shpreh mirënjohjen e saj për kontributin, përkushtimin dhe profesionalizmin e treguar nga z. Shkëmbi gjatë periudhës në drejtimin e skuadrës, dhe i uron atij suksese të mëtejshme në karrierën e tij”, shkruhej në njoftimin në rrjetet sociale të Tiranës që mbylli kështu këtë etapë të Shkëmbit në klubin kryeqytetas.
Tani pritet të mësohet se cili do të jetë destinacioni i radhës i Shkëmbit dhe kush do ta zëvendësojë atë në pankinën e lënë bosh në klubin bardheblu. Mes emrave favorite dhe kandidate edhe Ditmar Bicaj, i cili ndodhet në “pole position” teksa ka pezull ende propozimin e ardhur nga kombëtaraja e Ruandës, teksa drejtuesit e federatës së kombëtares afrikane, e kanë takuar në kryeqytet dhe kanë biseduar. Bicaj ka bërë një punë të mrekullueshme te Burreli sezonin e shkuar në eksperiencën e tij të parë në stol si trajner.
