Gjatë fundjavës në disa zona rreth Tiranës është raportuar për vatra të mëdha zjarri që kanë përfshirë sipërfaqe të tëra pyjore, duke rrezikuar pronat e banorëve.
Vatra më e madhe e regjistruar orëve të fundit ka qenë në Bërzhitë, ku flakët dhe tymi i dendur kanë pushtuar zonën. Banorët kanë kërkuar ndihmë nga autoritetet për të vënë në kontroll këtë vatër flakësh.
Pavarësisht se ka pasur shumë raportime për zjarre, fatmirësisht në Tiranë nuk është ndjerë era e tymit.
Për këtë një reagim në rrjetet sociale e ka bërë dhe gazetari Flavio Qarri, i cili thotë se kjo ndodh për shkak të smogut të bollshëm që ka kryeqyteti.
“Tirana po digjet nga çdo anë. Por në qytet nuk ndjehet era zjarrit dhe e tymit se shyqyr kemi smog të fortë,” shkruan ai në një postim.
IliriaNews shton se shumë raporte ndërkombëtare kanë vënë në pah cilësinë e keqe të ajërit që ka në kryeqytet. Numri i lartë i makinave në rrugë por dhe kantieret e shumta të ndërtimit, ndikojnë drejtpërdrejt në përkeqësimin e cilësisë së ajërit.
