Një ngjarje tragjike tronditi juglindjen e vendit pasditen e sotme në fshatin Pirg të Maliqit, ku një sherr mes dy 14-vjeçarëve rezultoi fatal për njërin prej tyre i cili fatkeqësisht humbi jetën.
Ngjarja ndodhi rreth orës 17:00 ku adoledhentët u përleshën në një konflikt me thika në ambientet e një lokali. Si pasojë Erald Xhejo, mbeti i plagosur rëndë dhe u transportua me urgjencë drejt spitalit të Korçës. Pavarësisht ndërhyrjes mjekësore, ai nuk arriti t’u mbijetojë plagëve.
Shkak i ngjarjes dyshohet një konflikt i nisur në rrjetin social TikTok. Kjo ngjarje rikthen në vëmendje dështimin e institucioneve për të parandaluar përshkallëzimin e dhunës mes të rinjve nëpërmjet rrjeteve sociale. Vetëm pak muaj më parë, Shqipëria u trondit nga një ngjarje e ngjashme në Tiranë, ku humbi jetën një tjetër 14-vjeçar, Martin Cani, pas një konflikti mes adoleshentësh.
Pavarësisht premtimeve dhe masave të shpallura nga qeveria në atë kohë, duket se asgjë nuk ka ndryshuar në terren. Edhe propozimi për mbylljen e rrjetit social TikTok, i cilësuar si nxitës i sjelljeve të dhunshme tek të rinjtë, rezultoi të ishte thjesht një retorikë politike e kryeministrit. Në realitet ky rrjet social dhe përmbajtja e tij e dhunshme nuk u parandalua.
Sot e kësaj dite TikTok vijon të përdoret në masë masive nga të rinjtë, dhe qeveria nuk ka mundur ta ndalojë.
Deri sa institucionet shtetërore të vazhdojnë të reagojnë me propagandë ndaj këtyre fenomeneve serioze, shoqëria shqiptare do të vijojë të përballet me ngjarje tragjike që godasin gjithmonë më shumë moshat e reja.
