Aventura e dytë e Thiago Silvës me Fluminense ka marrë fund më herët se sa pritej, pas një marrëveshjeje të përbashkët për ndarjen me klubin nga Rio de Janeiro. Mbrojtësi brazilian u ndan nga Fluminense pas përfundimit të kontratës së tij, e cila skadonte në gjashtë muaj. Me 41 vjet, ish-mbrojtësi i Milanit nuk ka ndërmend të tërhiqet nga futbolli. Ndërkohë, largimi nga Fluminense është pjesë e një plani të madh: rikthimi në Evropë për të provuar vlerën e tij në një kampionat konkurrues dhe për të mbajtur gjallë shpresat për një thirrje të mundshme në kombëtaren braziliane për Kupën e Botës që nis verën e ardhshme.
Thiago Silva ëndërron gjithashtu që të mbyllë karrierën e tij pikërisht atje ku u bë një nga mbrojtësit më të mirë në botë, te AC Milan. Ai e ka shprehur hapur dashurinë për kuqezinjtë dhe do të pranonte me kënaqësi një “vallëzim të fundit” në “San Siro”. Megjithatë, ky skenar duket se është në kundërshtim me strategjinë aktuale të Milanit, e cila fokuson investimet në lojtarë të rinj, me potencial dhe më të përballueshëm financiarisht.
Fluminense e përshëndeti Silvën me një deklaratë zyrtare, duke e vlerësuar kontributin e tij të jashtëzakonshëm si kapiten. Ai përfundon aventurën e tij të dytë me klubin me 212 paraqitje dhe 19 gola, përfshirë trofeun e Kupës së Brazilit në vitin 2007 dhe një rol kyç në arritjen e gjysmëfinaleve të Kupës së Botës për Klube. Klubi e falënderoi për profesionalizmin dhe përkushtimin e tij, duke i uruar suksese në sfidën e re që zgjodhi, e cila mund të jetë edhe e fundit për një karrierë të jashtëzakonshme që e bëri atë një legjendë në futbollin brazilian dhe ndërkombëtar.
Kështu, Thiago Silva hap një kapitull të ri në karrierën e tij, duke kërkuar mundësi të reja për të vazhduar pasionin e tij për futbollin.
