Policia Kufitare e Portit Sarandë ka ndëshkuar me 100 mijë lekë gjobë dhe ka bllokuar një mjet lundrues tip Jet Ski, pasi lundroi brenda perimetrit të sigurisë ujore në zonën e pushuesve në Ksamil.
Ndërhyrja u bë pas një ankese të depozituar në portalin e bashkëqeverisjes, ku denoncohej se Jet Ski po qarkullonte në zonën e ndaluar, duke rrezikuar pushuesit. Pamjet e rastit u publikuan edhe në rrjetet sociale.
Pas verifikimeve, mjeti rezultoi në pronësi të shtetasit S. D., ndaj të cilit u aplikua masa administrative për shkelje të nenit 24/1/c të Ligjit nr. 43/2020 “Shkelja e perimetrit të sigurisë, duke lundruar në zonat e ndaluara”.
Policia Kufitare apelon për respektimin rigoroz të perimetrit të sigurisë ujore dhe rregullave të përdorimit të mjeteve lundruese, duke paralajmëruar se shkelësit do të përballen me masa të menjëhershme. Qytetarët ftohen të raportojnë çdo rast shkeljeje në numrin 112.
