Më shumë se 1,000 persona në Mbretërinë e Bashkuar me dyshime për demencë do t’i nënshtrohen një testi të ri gjaku për Alzheimer, i cili pritet të sjellë ndryshime të mëdha në mënyrën si diagnostikohet kjo sëmundje.
Testi është projektuar për të zbuluar biomarkerë që tregojnë praninë e proteinave problematike (amyloid dhe tau), të cilat grumbullohen në tru shumë vite para se të shfaqen simptomat. Ai do të përdoret së bashku me testet e zakonshme njohëse me shkrim e laps, të cilat shpesh japin diagnoza të pasakta në fazat e hershme.
Shkencëtarët në University College London, që po drejtojnë provën, besojnë se saktësia e diagnostikimit mund të rritet nga 70% në mbi 90%. Testi, i cili kushton rreth 100 paund, mat një biomarker të quajtur p-tau217 dhe mund të bëhet më i aksesueshëm krahasuar me skanimet e trurit apo punksionin lumbal, që aktualisht përdoren vetëm në 2% të rasteve.
Studimi, i quajtur ADAPT, po zhvillohet në 20 qendra kujtese të NHS në gjithë Mbretërinë e Bashkuar dhe mbështetet nga Alzheimer’s Society dhe Alzheimer’s Research UK. Gjysma e pacientëve do të marrin rezultatet brenda tre muajve, ndërsa pjesa tjetër pas 12 muajsh, për të parë nëse diagnoza e hershme ndihmon në trajtim dhe planifikim.
Profesor Jonathan Schott nga UCL e cilësoi këtë si “një hap vendimtar drejt revolucionit në diagnostikimin e demencës”. Nëse testi rezulton i suksesshëm, ai mund të bëhet pjesë e rutinës mjekësore, veçanërisht në një kohë kur disa ilaçe të reja për fazat e hershme të sëmundjes janë në fazat përfundimtare të provave klinike.
Familjet e prekura e shohin këtë si një ndryshim rrënjësor. Steven Pidwill, 71 vjeç nga Londra, i cili kujdeset për bashkëshorten e tij me Alzheimer prej gati një dekade, tha se një test i shpejtë dhe i saktë i gjakut do ta ndryshonte tërësisht perceptimin e shoqërisë ndaj kësaj sëmundjeje.
Rezultatet përfundimtare të studimit pritet të publikohen brenda tre vitesh.
