Meteorologu grek Sakis Arnaoutoglou ka paralajmëruar për kushtet meteorologjike ekstreme që pritet të ndodhin në disa zona të Shqipërisë perëndimore dhe veriperëndimore. Arnaoutoglou, përveç se është specialist në meteorologji, është dhe eurodeputet i partisë PASOK në Greqi. Ai ka shumë ndjekës nga Shqipëria dhe shpesh merr pjesë në edicionet informative të Top Channel.
Në një video të publikuar në kanalin e tij në YouTube, ai u bën thirrje banorëve dhe turistëve të jenë të kujdesshëm, duke paralajmëruar për reshje të mëdha shiu dhe stuhi të fuqishme me vetëtima dhe breshër, të cilat priten gjatë ditës së shtunë. Sipas tij, nga mesdita deri në mbrëmje, zona të caktuara në Shqipëri do të përjetojnë errësim të motit dhe fenomene të rrezikshme që mund të shkaktojnë përmbytje të mëdha.
Arnaoutoglou thekson se këto kushte do të ndodhin gjithashtu në veri të detit Jon dhe në rajonet perëndimore të Greqisë, duke përfshirë qytetet Janinë dhe Follorinë, që ndodhen afër kufirit me Shqipërinë. Ai parashikon që këto fenomene të rrezikshme do të vazhdojnë deri në mesditën e së dielës, duke u shfaqur në forma lokale, përfshirë mundësinë e reshjeve të shiut në Tiranë, Durrës, Shëngjin dhe Shkodër.
Si masë parandaluese, Arnaoutoglou këshillon të shmanget qarkullimi me automjete gjatë stuhive dhe në rrugët të cilat rrezikojnë përmbytje. Kjo është një masë e domosdoshme për të siguruar sigurinë e qytetarëve në këto kushte të ashpra. Korrespondenti i Top Channel në Greqi, Aleksandër Marku, gjithashtu thekson se situata meteorologjike kërkon vëmendje dhe kujdes maksimal nga ana e autoriteteve dhe banorëve që jetojnë në këto zona të prekura.
