Një 24-vjeçar shqiptar, i identifikuar si Mario Nikprelaj, u deklarua fajtor dhe u dënua me 18 muaj burgim, pasi ka tentuar të hapë derën e avionit gjatë një fluturimi për në SHBA.
Sipas mediave të huaja, vendimi për Nikprelajn vjen vetëm 7 muaj pas incidentit të ndodhur në fluturimin e “Delta Airlines”, ku ai u përpoq të hapte me forcë derën e avionit në fluturim dhe për pak sa nuk shkaktoi tragjedi ajrore po të mos ishte ndërhyrja e stafit dhe stjuardesave.
I lindur në Michigan, shqiptari filloi të shkaktonte probleme në një fluturim të Delta-s të operuar nga Sky West, i cili ishte nisur nga Nebraska për në Detroit, korrikun e kaluar.
24-vjeçari bëri deklarata shqetësuese dhe të pahijshme ndaj pasagjerëve të tjerë dhe ekuipazhit të fluturimit. Ai gjithashtu refuzoi të vendoste rripin e sigurimit derisa një asistente fluturimi e bindi.
Problemet vazhduan gjatë ngritjes, pasi 24-vjeçari e hoqi vazhdimisht rripin e sigurimit, pavarësisht se iu kërkua ta vendoste përsëri, dhe lëvizte vazhdimisht ndërsa avioni ngrihej, thanë prokurorët.
