Donald Trump i lidhi pretendimet e tij për Groenlandën me faktin se nuk iu dha Çmimi Nobel për Paqen në një letër që i dërgoi kryeministrit norvegjez Jonas Gaard Store.
“Duke marrë parasysh se vendi juaj vendosi të mos më japë Çmimin Nobel për Paqen për faktin se ndalova mbi 8 luftëra, nuk ndiej më detyrimin të mendoj ekskluzivisht për paqen”, thuhet në letrën e Trumpit, sipas Bloomberg.
PBS News raportoi se stafi i Këshillit të Sigurisë Kombëtare të Shteteve të Bashkuara (NSC) dërgoi letrën tek disa ambasadorë evropianë në Uashington.
“Edhe pse paqja do të mbetet prioriteti kryesor, tani mund të mendoj për atë që është e drejtë dhe e mirë për Shtetet e Bashkuara të Amerikës. Bota nuk është e sigurt nëse nuk kemi kontroll të plotë dhe absolut mbi Grenlandën,” shtoi presidenti amerikan.
Informacioni fillestar për letrën u shpërnda në X nga gazetari Nick Shifrin, ndërsa as Shtëpia e Bardhë dhe as zyra e kryeministrit të Norvegjisë nuk kanë bërë ende ndonjë deklaratë mbi këtë çështje.
Çmimi Nobel për Paqen nuk jepet nga qeveria norvegjeze, por nga një komitet i pavarur.
“Sa i përket Çmimit Nobel për Paqen, unë i kam shpjeguar herë pas here Trumpit atë që është gjerësisht e njohur: se çmimi jepet nga Komiteti i Pavarur Nobel dhe jo nga qeveria norvegjeze,” kishte deklaruar Støre në një njoftim për Bloomberg.
Rritja e tensioneve me Evropën dhe NATO-n
Trump gjatë fundjavës kërcënoi me vendosjen e tarifave ndaj vendeve anëtare evropiane të Aleancës (NATO) nëse nuk merr kontrollin e Groenlandës. Kjo përshkallëzim shkaktoi reagime të forta tek liderët e Bashkimit Evropian.
Ambasadorët e BE-së u takuan të dielën për të shqyrtuar opsionet, përfshirë vendosjen e tarifave mbi produkte amerikane me vlerë 93 miliardë euro (108 miliardë dollarë). Liderët e Bashkimit pritet të takohen të enjten.
Në një postim në platformën Truth Social, Trump shkroi: “NATO i thotë Danimarkës prej 20 vitesh që duhet të largojë kërcënimin rus nga Grenlanda. Fatkeqësisht, Danimarka nuk mundi të bëjë asgjë. Tani është koha dhe do të ndodhë!!!”.
Këtë mesazh e përsëritën edhe zyrtarë të lartë amerikanë, përfshirë sekretarin e Thesarit, Scott Bessent, i cili deklaroi se Evropa është tepër e dobët për të garantuar sigurinë e Groenlandës.
