Të paktën pesë persona, mes tyre dy roje sigurie janë vrarë nga të shtënat pranë një kampi emigrantësh në Dunkirk të Francës. Sipas raportimeve të mediave të huaja, ngjarja ka ndodhur në Loon-Plage dhe policia ka konfirmuar se është kryer vrasje e shumëfishtë.
Autoritetet konfirmuan se dy roje sigurie dhe dy emigrantë u vranë në vendin e ngjarjes, ndërsa një person i pestë u vra në Wormhout, rreth pesë kilometra në jug të Kanalit Anglez.
I dyshuari u dorëzua dhe pranoi vrasjet, tha një burim i njohur me hetimin, pa dhënë detaje mbi incidentin. Autori i dyshuar është 22 vjeç dhe ka lindur në Dunkirk. Ai nuk është i njohur për policinë, ndërsa në makinë i janë gjetur katër armë.
