Më 17 prill, në Gjykatën Themelore në Prishtinë zhvillohet seanca e parë gjyqësore lidhur me sulmin e armatosur në Banjskë të Zveçanit, ku në bankën e të akuzuarve do të ulen Vlladimir Tolliq, Bllagoje Spasojeviq dhe Dushan Maksimoviq.
Të tre u arrestuan pas ngjarjes së shtatorit 2023, kur një grup i armatosur serbësh sulmoi Policinë e Kosovës, duke vrarë rreshterin Afrim Bunjaku. Në përleshjet që pasuan, humbën jetën edhe tre nga sulmuesit.
Në shtator 2024, Prokuroria Speciale e Kosovës ngriti aktakuzë ndaj 45 personave për terrorizëm, financim të terrorizmit dhe vepra të tjera penale të rënda. Shumica prej tyre, përfshirë Millan Radoiçiqin — ish-nënkryetar i Listës Serbe dhe personi që mori përgjegjësinë për sulmin — janë ende në arrati, kryesisht në Serbi.
Në seancën përgatitore të mbajtur më 9 tetor 2024, Prokuroria kërkoi që procesi gjyqësor të nisë edhe për të akuzuarit që ndodhen jashtë Kosovës. Kërkesë kjo që u kundërshtua nga mbrojtja, me arsyetimin se bie ndesh me legjislacionin në fuqi. Për këtë çështje, gjyqtari Arben Hoti kërkoi interpretim nga Gjykata Supreme, e cila u shpreh se vendimi mbetet në diskrecionin e gjykatësit — por një vendim përfundimtar ende nuk është marrë.
Nga të pandehurit në këtë rast, Vlladimir Tolliq dhe Bllagoje Spasojeviq nuk pranuan të deklarohen për fajësinë, ndërsa Dushan Maksimoviq u deklarua i pafajshëm.
Prokuroria Speciale i ngarkon të akuzuarit me kryerjen e veprave terroriste dhe shkelje të rendit kushtetues dhe sigurisë së Kosovës. Sipas aktakuzës, grupi kishte për qëllim, përmes dhunës dhe përdorimit të armatimit të rëndë, shkëputjen e veriut të Kosovës — zonave të banuara me shumicë serbe — për t’i bashkuar ato me Serbinë.
Millan Radoiçiq konsiderohet udhëheqësi i grupit, dhe Prokuroria e përshkruan atë si figurën kryesore në organizimin dhe koordinimin e sulmit, si dhe në aktivitetet kriminale që pasuan.
