*Shënim: Fotoja është ilustruese pasi emrat ende nuk janë bërë publik
Drejtoria e Përgjithshme e Tatimeve ka bërë të ditur se ka nisur një hetim ndaj 100 individëve dhe subjekteve për mosdeklarimin e të ardhurave të përfituara nga rrjetet dhe platformat digjitale si Facebook, TikTok, YouTube, Instagram, Google dhe PayPal.
Sipas të dhënave paraprake, dyshohet se shuma totale e të ardhurave të padeklaruara arrin në rreth 33 milionë euro.
“Drejtoria e Hetimit ka filluar verifikimet ndaj 100 tatimpaguesve, të cilët dyshohet se kanë përfituar të ardhura nga platformat sociale pa i deklaruar ato në organet tatimore”, thuhet në njoftimin zyrtar të Tatimeve.
Autoritetet tatimore u bëjnë thirrje të gjithë individëve dhe bizneseve të përfshira që të përmbushin detyrimet ligjore përmes vetëdeklarimit në platformën DIVA 2024, në mënyrë që të shmangin gjobat dhe masat e tjera ndëshkuese.
“Administrata Tatimore ka njoftuar që më 29 mars përmes kanaleve të saj zyrtare se çdo tatimpagues që ka realizuar të ardhura nga burime të tilla, duhet të bëjë vetëdeklarimin. Ftojmë të gjithë ata që nuk kanë reaguar ende, ta bëjnë sa më parë këtë detyrim për të shmangur penalitetet që mund të pasojnë nga hetimet e thelluara”, përfundon njoftimi i Drejtorisë së Përgjithshme të Tatimeve.
