Kryeministri i Maqedonisë së Veriut, Hristjan Mickoski, ka ndezur debat të gjerë në opinionin publik pas deklaratës së tij më të fundit, ku ai propozoi mundësinë që shteti të vendosë një taksë për personat që janë të pamartuar
Deklarata ka shkaktuar reagime të menjëhershme në rrjetet sociale, ku shumë qytetarë e kanë cilësuar propozimin si të papranueshëm dhe në kundërshtim me të drejtat individuale. “Shteti nuk mund të ndërhyjë në zgjedhjet personale të qytetarëve,” shkruan përdoruesit në rrjetet sociale. Edhe organizatat për të drejtat e njeriut kanë shprehur shqetësimet e tyre , duke paralajmëruar se një masë e tillë mund të shkelë parimet bazë të barazisë dhe të lirisë personale.
Përfaqësues të opozitës e kanë quajtur idenë absurde dhe thanë se në vend të taksave ndëshkuese, qeveria duhet të përqendrohet në politika sociale që u japin shpresë të rinjve, përmes vendeve të punës, strehimit dhe mbështetjes për familjet e reja.
Sipas të dhënave të fundit nga Enti Shtetëror i Statistikave, Maqedonia e Veriut po përballet me një rënie të ndjeshme të popullsisë dhe një rënie të vazhdueshme të lindshmërisë, ndërkohë që moshat e martesës dhe lindjes së parë po shtyhen gjithnjë e më shumë. Gjatë një interviste televizive, Mickoski kryeministi I Maqedonise se Veriut tha: “Ne jemi duke shqyrtuar forma të ndryshme për të stimuluar rritjen e lindshmërisë . Një nga idetë është vendosja e një takse simbolike për ata qytetarë që zgjedhin të mos martohen deri në një moshë të caktuar, si mënyrë për të inkurajuar krijimin e familjeve.”
Ai nuk dha detaje konkrete mbi kufirin e moshës që do të prekte kjo takes apo shifrën e saj, por theksoi se kjo ide nuk është ndëshkuese, por stimuluese, duke shtuar se qeveria do të ofrojë njëkohësisht përfitime dhe mbështetje për çiftet e reja që martohen dhe bëhen prindër.
Mickoski deklaroi në intervistën e tij për mediat në Maqedoninë e Veriut se në vitin 2024 kishin lindur 16.061 fëmijë ndërsa kishin ndërruar jetë 20,201 persona duke shkaktuar një humbje në popullësi prej 4140 personash. Kryeministri tha se vetëm në 4 vitet e fundit Maqedonia e Veriut kishte humbur 33.000 mijë persona në popullsinë e saj.
Për momentin, ideja për vendosjen e një takse për të pamartuarit mbetet në fazë diskutimi, por ka rikthyer vëmendjen publike te sfidat që po përjeton vendi në aspektin demografik – dhe te kufiri mes politikave nxitëse dhe ndërhyrjes në jetën private të qytetarëve.
