Kreu i Partisë Demokratike, Sali Berisha përmes një postimi në “Facebook” ka reaguar në lidhje me takimin e zhvilluar mes presidentit amerikan, Donald Trump dhe homologut të tij rus, Vladimir Putin në Alaskë. Berisha e ka cilësuar samitin si historik.
Ai thekson se bisedimet përfunduan pa një marrëveshje ndërsa shtoi se takimi ka sjellë progres të madh. Berisha e ka quajtur samitin një kthesë të mundshme në rrugën drejt armëpushimit dhe marrëveshjes përfundimtare midis palëve.
“Alaska një samit historik. Miq, samiti i djeshëm në Alaska midis Presidentit të SHBA Donald Trump, njeriut më të fuqishëm të planetit me Presidentin e Rusisë Vladimir Putin ishte historik për këtë kohë lufte. Samiti pas tre orësh bisedime përfundoi pa marrëveshje, por me ‘progres shumë të madh’ deklaroi Presidenti Trump në konferencën e përbashkët për shtyp me Vladimir Putin (foto nga Reuters). Kjo nënkupton se Samiti ka shënuar një kthesë të mundshme në rrugën drejt armëpushimit dhe marrëveshjes përfundimtare midis palëve,” shkruan Berisha.
