Albin Kurti po përgatitet të prezantojë përbërjen e kabinetit të tij qeveritar dhe programin e Qeverisë së re në një seancë plenare që zhvillohet të dielën.
Ai është mandatar i parë për kryeministër që del para deputetëve pa siguruar paraprakisht shumicën e kërkuar prej 61 votash. Partia e tij, Lëvizja Vetëvendosje, ka siguruar 48 ulëse në Kuvend, por i nevojiten të paktën pesë vota shtesë.
Përkrahje ka nga disa deputetë të komuniteteve pakicë joserbe, si dhe Nenad Rashiqi, por nuk dihet nëse Kurti ka arritur të sigurojë votat e nevojshme.
Lëvizja Vetëvendosje ka përjashtuar mundësinë e bisedimeve me Partinë Demokratike (PDK), të dytën për nga fuqia e votës, dhe e kanë lënë të hapur bashkëpunimin me Lidhjen Demokratike (LDK) dhe Nismën Socialdemokrate.
Mirëpo, LDK e ka refuzuar çdo lloj bashkëpunimi. Deputetja Hykmete Bajrami e konfirmoi këtë qëndrim, duke deklaruar se nuk ka pasur asnjë kontakt nga Vetëvendosje.
Fatmir Limaj, kryetar i Nismës, gjithashtu njoftoi se nuk do ta mbështesë Qeverinë Kurti 3, pavarësisht negociatave për një koalicion të mundshëm. Iu ofruan pozita në qeveri, por kërkesa e tij për postin e kryeparlamentarit u konsiderua e papranueshme.
Historikisht, mandatarët për kryeministër janë zgjedhur me shumicë votash. Kurti sheh vështirësi në formimin e qeverisë dhe ka folur për tensionet dhe xhelozitë brenda skenës politike, duke lënë të hapur mundësinë për zgjedhje të reja nëse nuk sigurohet shumica.
Nëse Kurti dështon, presidentja Vjosa Osmani ka paralajmëruar se do t’i thërrasë partitë për konsultime, me qëllim që të gjendet një zgjidhje e përbashkët. Përndryshe, një mandatari të dytë do t’i jepet 15 ditë kohë për të përgatitur një tjetër propozim për qeveri.
Nëse as kjo përpjekje dështon, sërish shpallen zgjedhje të reja brenda 40 ditëve. Dallimet politike kanë ndikuar në vonesat e formimit të Kuvendit, që u konstituua dy javë pas zgjedhjeve të fillim-shkurtit.
