Ministri i Shtetit, Taulant Balla, ka pritur sot në një takim të veçantë në Tiranë Endrit Thaçin, djalin e ish-Presidentit të Kosovës, Hashim Thaçi.
Vizita e Endrit Thaçit vjen në një moment kur babai i tij po përballet me procesin gjyqësor në Hagë.
Përmes një postimi në rrjetet sociale, ministri Balla njoftoi se Endrit Thaçi kishte sjellë një mesazh personal nga Haga.
“Sot pata kënaqësinë të mirëprisja në Tiranë Endrit Thaçin, djalin e Presidentit Hashim Thaçi, i cili më solli nga Haga përgëzimet për zgjedhjet dhe haberin e mirë se Presidenti Thaçi është i fortë, krenar si gjithmonë për epopenë e lavdishme të UÇK dhe popullit të Kosovës”, shkroi ai.
Takimi vjen në një kohë kur figura e Hashim Thaçit vijon të përbëjë një simbol qëndrese dhe krenarie për shumë shqiptarë, ndërsa procesi në Hagë shihet nga një pjesë e opinionit si një sprovë historike për drejtësinë dhe luftën çlirimtare të UÇK-së.
Endrit Thaçi, i cili shpesh ka qenë zëdhënës i përkushtimit të familjes Thaçi për të vërtetën dhe dinjitetin e luftës së Kosovës, u prit në Tiranë me respekt dhe solidaritet të hapur nga autoritetet shqiptare.
