Sot në Ankara zhvillohet “Këshilli Suprem i Bashkëpunimit Greqi–Turqi”, në një atmosferë të tensionuar mes dy vendeve, partnere në NATO, që vazhdojnë të përballen me mosmarrëveshje të thella mbi kufijtë detarë. Në këtë forum do të marrin pjesë Presidenti turk Rexhep Tajip Erdogan dhe Kryeministri grek Kyriakos Mitsotakis, me mundësinë e një takimi të drejtpërdrejtë shikohet si një test i vullnetit politik për të vazhduar dialogun.
Këshilli u krijua në vitin 2010 për të ulur tensionet pas krizave të përsëritura në Mesdheun Lindor, megjithatë deri tani është mbledhur vetëm pesë herë, me takimin më të fundit të ndodhur në Athinë në dhjetor 2023. Pavarësisht se nuk ka prodhuar marrëveshje të rëndësishme, ky mekanizëm ka si qëllim të ruajë një agjendë pozitive, veçanërisht në fushat e ekonomisë dhe turizmit.
Tensionet e fundit përfshijnë përdorimin nga Turqia të sistemit të navigacionit detar “Navtex”, përmes të cilit Ankaraja paralajmëroi mbi rreziqe sigurie dhe aktivitete ushtarake greke në zona të diskutueshme të Egjeut. Greqia e shikon këtë si një përpjekje të Turqisë për të zgjeruar kontrollin mbi hapësirën detare, ndërsa Turqia e paraqet si një procedurë teknike rutinë.
Kjo situatë ka ndikuar edhe në politikën e brendshme greke, ku Kryeministri Mitsotakis përballet me kritika nga e djathta nacionaliste për zbutjen ndaj Ankarasë, ndërsa tensionet në det vazhdojnë të rriten. Problemet ndërmjet dy vendeve lidhen kryesisht me kërkesat për shfrytëzimin e burimeve natyrore dhe zgjerimin e ujërave territoriale në Egje. Turqia, përmes doktrinës së saj ushtarake “Atdheu Blu”, pretendon zona të gjera detare, ndërsa Greqia thekson të drejtat sipas Konventës së OKB-së për të Drejtën e Detit, që parashikon ujëra territoriale deri në 12 milje – një konventë që Turqia nuk e ka nënshkruar. Kjo pamje e tensionuar ndikon ndjeshëm në marrëdhëniet midis dy vendeve dhe mundësitë e zgjidhjes së tyre.
