Bologna arriti një fitore të rëndësishme këtë javë në transfertë 0-1 ndaj Venezia-s. Ekipi i drejtuar nga Vincenzo Italiano renditet në vend të katërt dhe do të synojë të qëndrojë aty deri në fund për të siguruar pjesëmarrjen në Champions League për sezonin e ardhshëm, për të dytin vit rresht.
Ajo që ka tërhequr vëmendjen e shumë tifozëve në ndeshjet e fundit të Bologna-s është shenja e çuditshme pas qafe e sulmuesit danez, Jens Odgaard. Komentet në rrjetet sociale kanë qenë të shumta, po ashtu edhe aludimet.
Duke parë reagimet e ndryshme dhe të shumta, danezi ka reaguar vetë përmes një postimi në rrjetet sociale dhe ka shpjeguar për çfarë bëhet fjalë. “Është thjesht një ilaç që duhet ta përdor për qafën, asgjë serioze”, shkruan Odgaard, duke e shoqëruar me një emoji duke qeshur.
Kujtojmë që danezi fillimisht u huazua te Bologna nga Az Alkmaar dhe në fund të sezonit të kaluar u transferua në mënyrë përfundimtare te klubi Italian për 4.5 milionë euro. Ai ka shënuar 6 gola deri tani këtë sezon për Bologna-n dhe ka dhënë 3 asiste.
