Pasi fitoi titullin në La Liga, Hansi Flick ka nisur projektimet për ekipin e sezonit të ardhshëm, ky synimi madhor është padyshim triumfi në Champions League, duke qenë se këtë sezon ishin vetëm pak minuta larg finales së madhe.
Në takimin e fundit që ka pasur me bordin e Barcelonës, Flick ka qenë i prerë dhe ka kërkuar përforcime urgjente në disa reparte ku ekipi ka më së shumti nevojë dhe një prej tyre është porta. Situata me Ter Stegen është shqetësuese, gjermani u rikthye pas një dëmtimi që e la jashtë për muaj me radhë, por ende duket shumë larg formës së dikrushme dhe nuk dihet nëse do arrijë të rikthehet sërish në ato nivele.
Wojciech Szczesny ka bërë paraqitje të mira, por polaku për shkak edhe të moshës nuk shihet më si një zgjidhje afatgjatë, ndaj Flick ka kërkuar me patjetër transferimin e një portieri cilësor gjatë verës. Deri tani janë përmendur disa emra si Leo roman, Joan Garcia apo edhe Diogo Costa, por drejtori sportiv, Deco, ende nuk ka vendosur. Ajo që dihet me siguri është se Deco po punon sipas udhëzimeve të Flick: të gjejë një portier të besueshëm me përvojë dhe mbi të gjitha të garantojë sukses për një periudhë afatgjatë.
