Sali Berisha foli për sulmin ndaj gazetarëve në raportimin e protestës së mbajtur më 16 maj pas zgjedhjeve të 11 majit ku doli fituese PS.
Ai ka vlerësuar kontributin e gazetarëve, veçanërisht të atyre të kronikës, në pasqyrimin e zhvillimeve elektorale dhe problematikave që ai i cilëson si “farsë elektorale”.
Gjatë një deklarate për mediat, Berisha theksoi se raportet ndërkombëtare, përfshirë ato të OSBE/ODIHR, evidentojnë probleme serioze në mënyrën si u sollën disa media gjatë fushatës. Ai bëri dallimin mes gazetarëve të kronikës dhe disa mediave që, sipas tij, kanë vepruar në mënyrë të njëanshme dhe nën ndikimin e pushtetit.
Berisha nënvizoi gjithashtu rëndësinë e ruajtjes së një komunikimi të kujdesshëm dhe korrekt midis politikanëve dhe gazetarëve. Në përfundim, ai vlerësoi se marrëdhëniet e gazetarëve me Partinë Demokratike, përgjithësisht, kanë qenë normale.
Sali Berisha: Personalisht, kam falënderuar me sinqeritet gazetarët për kontributin që kanë dhënë në denoncimin e farsës elektorale. Ata kanë qenë kontribues i çmuar, ato kronika të tyre kanë qenë të çmuara. Të sugjeroj të lexosh raportet e OSBE çfarë thonë për mediat në Shqipëri. Ato thonë se mediat u sollën si diktaturë. S’e kam për gazetarët e kronikës, unë i përjashtoj gazetarët e kronikës, ka prej tyre që kanë rrezikuar veten në raportimet që kanë bërë. E thotë raporti si asnjë tjetër. Unë nuk e kam të gjithë episodin parasysh, por ju në këtë anë keni bërë pyetje dhe keni marrë përgjigje për çdo pyetje. Çdo politikan duhet të ketë kujdes të veçantë në marrëdhëniet me gazetarët. Por besoj se gazetari s’duhet të marrë porosi dhe të zbatojë porosi ku nuk është vendi se mund të shkaktojë gjaknxehtësi. Por marrëdhëniet me PD ju i keni pasur normale.
