Suedia po përballet me një rritje të shqetësueshme të aktivitetit të krimit të organizuar. Sipas të dhënave të publikuara nga Policia Kombëtare, në vend ka rreth 17,500 anëtarë aktivë të rrjeteve kriminale, ose dy kriminelë për çdo 1,000 banorë. Përveç tyre, rreth 50,000 persona të tjerë kanë lidhje të drejtpërdrejta ose të tërthorta me këto struktura.
Vendi nordik ka përjetuar një dekadë me dhunë të lidhur me bandat kriminale, ku të shtënat me armë dhe shpërthimet me eksplozivë janë bërë më të shpeshta, ndërsa përplasjet midis grupeve rivale dhe trafiku i drogës vazhdojnë të rriten.
Shefja e Policisë Kombëtare, Petra Lund, shpjegoi se ndryshimi i metodës së llogaritjes ka ndikuar në rritjen e shifrave krahasuar me raportin e vitit 2024, kur numri i anëtarëve aktivë ishte vlerësuar në 14,000. “Nuk kemi një tregues të qartë të rritjes apo uljes së aktivitetit kriminal, por kriteret më të rrepta që kemi përdorur përkufizojnë më qartë se kush konsiderohet aktiv,” tha Lund.
Qeveria e kryeministrit Ulf Kristersson, e cila mori pushtetin në 2022 me premtimin për të luftuar krimin, ka ndërmarrë masa të reja, duke përfshirë rritjen e kompetencave të policisë, uljen e moshës së përgjegjësisë penale nga 15 në 13 vjeç dhe krijimin e njësive të paraburgimit për të mitur.
Megjithëse numri i të shtënave fatale ka pësuar rënie, shpërthimet me eksplozivë janë shtuar ndjeshëm, duke vënë në dukje sfidat e vazhdueshme të autoriteteve. Petra Lund theksoi se bashkëpunimi institucional dhe social është i domosdoshëm për të përballuar këtë fenomen.
