Të paktën 14 persona kanë humbur jetën dhe më shumë se 100 të tjerë janë plagosur pasi stuhitë e forta të erës goditën pjesën qendrore dhe veriore të Pakistanit, pas një vale të nxehti ekstrem. Lajmi u konfirmua dje nga zyrtarët vendas.
Stuhitë, të shoqëruara me erëra të fuqishme, bubullima dhe vetëtima, përfshinë provincat lindore të Punjabit, veriperëndimore të Khyber-Pakhtunkhëas dhe kryeqytetin Islamabad të shtunën pasdite dhe në orët e mbrëmjes. Erërat e furishme shkaktuan dëme të mëdha materiale, duke shkulur pemë dhe rrëzuar shtylla elektrike në disa zona.
Sipas autoriteteve, shumica e viktimave humbën jetën si pasojë e shembjes së mureve dhe çative. Të paktën dy persona vdiqën pasi u goditën nga panele diellore që u shkëputën për shkak të erës së fortë. Në një tjetër incident tragjik, një burrë u vra dhe tre të tjerë u plagosën pasi u goditën nga rrufeja.
Mazhar Hussain, zëdhënës i Autoritetit për Menaxhimin e Fatkeqësive në provincën e Punjabit, tha se stuhitë ishin rezultat i temperaturave ekstreme që ditët e fundit kanë kaluar 45°C (113°F).
“Pati tre deri në katër ditë gjatë valës së fundit të të nxehtit ku temperaturat u rritën mjaft shumë”, tha ai, duke njoftuar 14 vdekje në Punjab dhe 100 të plagosur.
“Kjo stuhi ishte veçanërisht shkatërruese. Shpejtësia e erës ishte shumë e lartë. Kishte aq shumë pluhur saqë dukshmëria u zvogëlua shumë.”
Ndërkohë, Departamenti Meteorologjik i Pakistanit ka paralajmëruar për mundësinë e stuhive të tjera në ditët në vijim.
