Studuesi Auron Tare ka shprehur shqetësimin e tij në një postim në Facebook lidhur me kioskat e ndërtuara nga Ministria e Turizmit përgjatë segmentit Gryka e Këlcyrës-Bënjë. Ai thekson se këto struktura, të krijuara për të ofruar informacion për turistët, aktualisht janë kthyer në strehim për gomerët dhe nuk kanë asnjë funksion real. Sipas Tares, në epokën e teknologjisë dhe inteligjencës artificiale, ku informacioni është i aksesueshëm përmes telefonave celularë dhe aplikacioneve, ndërtimi i kioskeve duke shpenzuar rreth 2 milion euro nga Banka Botërore, është jashtë çdo logjike.
Ai e përshkruan situatën e kiosqeve si “të trishtueshme” dhe “të braktisura”, duke treguar se ato janë të ndryshkura dhe nuk ofrojnë asnjë shërbim. Edhe gjatë verës, ato shërbejnë më shumë si streha për kafshët sesa si pika informacioni për vizitorët. Tare përmend disa nga lokacionet e këtyre kiosqeve, përfshirë ato në dalje të urës së Këlcyrës, në qendër të Përmetit, dhe pranë Gurit të Qytetit.
Ai shpjegon se pas pyetjeve që i ka drejtuar Ministrisë së Turizmit dhe Bankës Botërore, nuk ka marrë asnjë përgjigje. Tare vë në dyshim qëllimin e ndërtimit të këtyre kiosqeve dhe thotë se askush nuk e di se për kë janë ndërtuar ato dhe çfarë informacioni ofrojnë. Nënvizon se në një kohë kur çdo udhëtar ka një telefon në xhep dhe mund të aksesojë informacionin në mënyrë dixhitale, është e paqartë pse vazhdojmë të investojmë në kioska të stilit të kaluar.
Ai apelon për një përgjigje nga ata që kanë investuar në këto struktura dhe shpreh se ky është një mister që kërkon sqarime nga Banka Botërore dhe Ministria e Turizmit, të cilët deri tani nuk kanë dhënë asnjë shpjegim për këtë situatë.
