Në një spital në New Delhi, një paciente që po i nënshtrohej operacionit për heqjen e fshikëzës së tëmthit dëgjonte muzikë të qetë me flaut në kufje, edhe pse ishte nën anestezi të përgjithshme. Sipas një studimi të ri të Kolegjit Mjekësor Maulana Azad, kjo qasje mund të ketë përfitime reale gjatë procedurave kirurgjikale.
Studiuesit u fokusuan te pacientët që i nënshtrohen laparaskopisë për heqjen e fshikëzës së tëmthit, një operacion relativisht i shkurtër. Sipas Dr. Farah Husain, specialiste e anestezisë, objektivi kryesor është që pacientët të zgjohen sa më qartë dhe me sa më pak dhimbje pas ndërhyrjes.
Tradicionalisht, kjo arrihet përmes kombinimit të ilaçeve dhe teknikave të bllokimit lokal të dhimbjes. Megjithatë, ekipi kërkimor vendosi të analizojë nëse muzika mund të reduktojë sasinë e propofolit dhe fentanylit, dy prej ilaçeve më të përdorura gjatë anestezisë.
Pas një studimi pilot me tetë pacientë, u zhvillua një studim i zgjeruar me 56 të rritur, të ndarë në dy grupe. Të gjithë morën të njëjtën përzierje ilaçesh, por vetëm njëri grup dëgjoi muzikë instrumentale të qetë të zgjedhur nga vetë pacientët.
Rezultatet treguan se pacientët që dëgjuan muzikë kishin nevojë për doza më të ulëta të ilaçeve, patën një rikuperim më të qetë dhe shfaqën nivele më të ulëta të hormonit të stresit. Gjithashtu, ata patën një kontroll më të mirë të presionit të gjakut gjatë operacionit. Sipas studiuesve, kjo ndodh për shkak se rrugët dëgjimore të trurit mbeten aktive edhe gjatë anestezisë.
Muzika është përdorur prej kohësh si mjet mbështetës në trajtime mjekësore, por futja e saj në praktikat e anestezisë shihet si një hap i rëndësishëm për përmirësimin e mirëqenies së pacientëve.
Ekipi i studiuesve tashmë po përgatitet për hapat e radhës, me synimin për të eksploruar edhe më thellë ndikimin e muzikës në proceset kirurgjikale dhe post-operatore.
