Demokratët me në krye kreun e kësaj force politike, Sali Berishën si dhe drejtuesi ne fushatës së tyre, Chris LaCivita pasditen e kësaj të diele u ndalën në Brescia të Italisë.
Ashtu si dhe njoftuam qysh më herët, Sali Berisha ka mbledhur shqiptarët që jetojnë dhe punojnë në Itali për t’i shpalosur programin e tij elektoral dhe objektivat që ai ka për të bërë sipas tij Shqipërinë një vend më të mirë sërish.
Fillimisht fjalën e mori “strategu” i fushatës së tij, Chris LaCivita i cili iu drejtua shqiptarëve që të votojnë masivisht në zgjedhjet e 11 Majit me qëllim për të ndryshuar të ardhmen e Shqipërisë.
Sipas amerikanit përgjatë 12 viteve që socialistët kanë qenë në pushtet vendin tonë i kanë ikur me dhjetëra njerëz të mirë dhe të mençur. Ndër të tjera ai theksoi se vetëm votimi masiv mund të sjellë ndryshimin, ashtu sikurse dhe në Shtetet e Bashkuara të Amerikës.
“Shqipëria po përballohet me një krizë të vërtetë. Ka humbur më të mirët dhe më të mençurit. Për mundësi dhe oportunitete që Shqipëria sot nuk i ofron. Nuk ofron oportunitete sepse gjatë 12 viteve të fundit, Edi Rama dhe socialistët e kanë bërë atë të pamundur. E vetmja rrugë për ta ndryshuar atë që të çoheni deh të gjithë të shkoni të votoni. Shqiptarët që janë jashtë Shqipërisë kanë një oportunitet të jashtëzakonshëm që të ndryshojnë të ardhmen e Shqipërisë.
Çdo votë ka rëndësinë e vetë, pro sidomos vota juaj. Ju jeni këtu për të vendosur për të ardhmen tuaj por edhe të familjes tuaj. Tashmë keni në dorë për të ndryshuar të ardhmen e Shqipërisë. Në 2024 Donald Trump u bë president i SHBA sepse solli për të votuar pjesën më të madhe të amerikanëve. Duke dalë të gjithë sa më shumë për të votuar në zgjedhjet e 11 majit për numrin 1 për doktor Berishën ju mund ta bëni Shqipërinë të mirë përsëri”, tha ai.
