Shtatë ditë përpara ndeshjes kualifikuese mes Shqipërisë dhe Serbisë që do të zhvillohet në Tiranë, FIFA ka lejuar që stadiumi të jetë i mbushur plot me tifozë shqiptarë. Ndërkohë, Serbia do të jetë pa mbështetjen e tifozëve të saj për shkak të një dënimi të vendosur ndaj Federatës Serbe të Futbollit.
Ky vendim ka ngjallur reagime të forta në mediat serbe, të cilat kanë filluar të hedhin akuza, duke pretenduar se në stadium do të jenë të pranishëm tifozët më radikalë shqiptarë. Sipas tyre, pritet një atmosferë e tensionuar dhe ndeshja nuk do të kufizohet vetëm në aspektin sportiv.
Më tepër shqetësim, megjithatë, duket se po shfaqin edhe tifozët nga Kosova që planifikojnë të marrin pjesë në ndeshje.
“Në Tiranë Serbinë e pret një ferr i vërtetë dhe është e sigurt që vëmendja nuk do të jetë vetëm te futbolli, por edhe te zhvillime të tjera”, shkruan media serbe “SportAlo!” në një nga artikujt e saj.
Shqipëria do të ndeshet me Serbinë më 7 qershor në “Arenën Kombëtare”, me fillim nga ora 20:45. Ndeshja pasuese, kundër Letonisë, do të zhvillohet më 10 qershor në stadiumin “Skonto Stadions”, po në orën 20:45.
