Mbrëmjen e sotme, Ministrja për Evropën dhe Punët e Jashtme, Elisa Spiropali, pati një telefonatë me Ministrin e Jashtëm të Izraelit, Gideon Sa’ar, ku u diskutua për fazën e parë të marrëveshjes së paqes dhe lirimin e pengjeve.
Në një postim në rrjetin social X, Spiropali theksoi rëndësinë e kësaj bisedë, duke e quajtur një moment domethënës në procesin e paqes.
Ajo i referohet “Agimit të Ri për Paqen dhe Njerëzimin,” duke shprehur optimizëm për këtë zhvillim, që nënkupton një hap të rëndësishëm humanitar, e që është fryt i përpjekjeve ndërkombëtare, sidomos atyre të udhëhequra nga Presidenti Donald Trump. Spiropali theksoi se ky proces është një triumf për jetën, dinjitetin dhe solidaritetin njerëzor.
Ministrja pranoi me ngrohtësi ftesën e Sa’ar për të vizituar Izraelin javën e ardhshme. Gjatë bisedës, ata riafirmuan miqësinë mes Shqipërisë dhe Izraelit, si dhe angazhimin për të thelluar bashkëpunimin në fusha të ndryshme, përfshirë partneritetin ekonomik dhe krijimin e një të ardhmeje më paqësore.
Kjo bisedë dhe ftesë për vizitë tregojnë përkushtimin e të dy vendeve për të avancuar marrëdhëniet dhe për të kontribuar në paqen në rajon.
