Një mbrëmje emocionuese futbolli u zhvillua në Shtutgart, ku Spanja dhe Franca dhuruan një ndeshje spektakolare me plot 9 gola. “La Roja” arriti një fitore dramatike 5-4, duke prerë biletën për finalen e tretë radhazi në UEFA Nations League.
Spanja e nisi ndeshjen me vrull, duke kaluar në avantazh në minutën e 22-të me golin e Williams, ndërsa vetëm tri minuta më pas Mikel Merino dyfishoi shifrat. Në pjesën e dytë, iberikët shtuan edhe më shumë ritmin: Lamine Yamal realizoi nga pika e bardhë në minutën e 54-të, dhe menjëherë më pas Pedri çoi rezultatin në 4-0. Yamal shënoi edhe golin e tij të dytë dhe të pestin për Spanjën në minutën e 67-të, duke vendosur në dukje dominimin e plotë të skuadrës së tij.
Franca reagoi në minutat e fundit të ndeshjes, por ishte shumë vonë për të përmbysur rezultatin. Mbappé realizoi me penallti në minutën e 59-të, ndërsa Cherki (79’), një autogol i Vivian (84’) dhe goli i Kolo Muanit në minutën e fundit shtesë (90+4’) ngushtuan diferencën, por pa arritur të shmangin humbjen.
Finalja e madhe e Nations League do të luhet të dielën, më 8 qershor, ku Spanja do të përballet me Portugalinë – dy skuadra në formë të lartë që synojnë të rrëmbejnë trofeun. Ndeshja do të transmetohet drejtpërdrejt në platformën Digitalb.
Rezultati përfundimtar: Spanjë 5-4 Francë
Golat:
Spanjë: Williams 22’, Merino 25’, Yamal (P) 54’, 67’, Pedri 55’
Francë: Mbappé (P) 59’, Cherki 79’, Vivian (autogol) 84’, Kolo Muani 90+4’
