Strukturat e posaçme të hetimit kanë ndërmarrë sot një aksion kontrolli në banesën e biznesmenit të njohur Artan Dulaku, në kuadër të hetimeve që lidhen me çështjen e njohur si “Porti i Limionit” në Sarandë.
Gjatë operacionit, i cili është zhvilluar nga Byroja Kombëtare e Hetimit, janë kryer verifikime në banesën dhe ambientet e punës së Dulakut, si edhe është sekuestruar telefoni i tij celular për analizë të të dhënave.
Gazetarja Klodiana Lala bëri të ditur se hetimi ka nisur prej rreth dy vitesh dhe se kontrollet janë kryer pas mbledhjes së provave që e justifikonin këtë veprim hetimor. Sipas saj, kontrolli ka zgjatur disa orë dhe ka vijuar më pas edhe në ambientet që lidhen me biznesmenin Genard Kastrati.
“Është një hetim i nisur para dy vitesh. Është bërë kontroll në banesë dhe është kryer kqyrja e celularit të biznesmenit,” – tha ajo, duke theksuar se ky është një proces në vijim dhe jo një ndërhyrje e beftë.
Lala shtoi se gjykata ka miratuar kërkesën e SPAK për kryerjen e kontrolleve në banesë, zyrë dhe mbi pasuritë e përfshira, pasi janë mbledhur prova që lidhen me mundësinë e përfshirjes së disa zyrtarëve të lartë në këtë çështje.
Sipas saj, procedura hetimore është përqendruar në ndjekjen e rrugës së fondeve dhe të kontratave që lidhen me projektin e portit, ndërsa çdo palë e përfshirë ka të drejtën të paraqesë pretendimet dhe provat e saj përkatëse.
Hetimet pritet të thellohen në ditët në vijim, ndërsa organet e drejtësisë ende nuk kanë dhënë një njoftim zyrtar mbi rezultatet paraprake të kontrolleve.
