SPAK i ka kërkuar Kuvendit të Shqipërisë t’i vërë në dispozicion një sërë dokumentesh të klasifikuara që lidhen me ngjarjet e 21 Janarit, si pjesë e hetimit që po zhvillohet për këtë çështje.
Gazetarja Klodiana Lala, e ftuar në emisionin “Të Paekspozuarit” në MCN TV, sqaroi se dorëzimi i këtyre materialeve mbetet në diskrecionin e Kuvendit. Dokumentet, sipas saj, përfshijnë të dhëna mbi zhvillimet para, gjatë dhe pas protestës së 21 Janarit.
Sipas Lalës, bëhet fjalë për materiale të arkivuara nga Kuvendi dhe të klasifikuara si “tepër sekret”, të cilat mund të përmbajnë vëzhgime apo përgjime të kryera në periudhën e organizimit të protestës.
Ajo shtoi se SPAK i konsideron këto dokumente thelbësore për të kuptuar nëse protesta ishte e orientuar drejt dhunës dhe për të zbardhur çfarë ndodhi brenda ambienteve të Kryeministrisë, ku u qëllua ndaj protestuesve.
Lala kujtoi se, sipas vendimeve të Gjykatës Evropiane për të Drejtat e Njeriut, 21 Janari është cilësuar si “vrasje shtetërore”, çka e ngre çështjen në një nivel të lartë serioziteti.
Megjithatë, edhe pse SPAK ka bërë kërkesë zyrtare, Kuvendi nuk është i detyruar t’i deklasifikojë dokumentet — vendimi mbetet në duart e tij.
“Duhet parë se si do të reagojë Kuvendi, sepse mundet edhe të vendosë të mos i ç’klasifikojë,” përmbylli Lala.
